नवलपुरमा जीप दुर्घटनामा परी दुई जनाको मृत्यु

काठमाडौं : नवलपरासी (बर्दघाट सुस्तापूर्व)को धौवादीमा भएको जीप दुर्घटनामा परी दुई जनाको मृत्यु भएको छ। दलदलेबाट १४ जना यात्रु लिएर डेडगाउँ जाँदै गरेको गण्डकी प्रदेश०४–००१ज–०००६ नम्बरको जीप हुप्सेकोट गाउँपालिका–५ धौवादीको कान्छीपानी नजिकै दुर्घटनामा परेको हो। दुर्घटनामा परी दुई जनाको घटनास्थलमै मृत्यु भएको र चालकसहित सात जना गम्भीर घाइते भएको हुप्सेकोट गाउँपालिका–५ का वडाध्यक्ष पदमबहादुर रानाले जानकारी दिए।
घाइतेहरूको उद्धार गरी उपचारका लागि कावासोती लगिएको छ। अहिले साँझ साढे ५ बजे भएको दुर्घटनामा जीप तीन सय मिटर तल खसेकाले घाइतेको उद्धार गर्न निकै समय लागेको थियो। जीपको ब्रेक फेल भई दुर्घटना भएको अनुमान गरिएको छ। मृतक तथा घाइतेको परिचय खुलेको छैन।