बुटवल ३१ साउन । सामाजिक सञ्जालको प्रयोगबाट पारिवारिक पुनर्मिलनसमेत हुन थालेको छ । पछिल्लो समय रूपन्देहीका अनाथ आश्रममा आश्रय लिइरहेका १० बालबालिकाको सामाजिक सञ्जालकै माध्यमबाट पारिवारिक पुनर्मिलन भएको छ । वर्षौंदेखि परिवारबाहिर रहेका र आश्रममा बसेका बालबालिकाले परिवार भेट्दा उनीहरूमा खुसीको सीमै छैन । रूपन्देहीमा पाँचवटा अनाथ आश्रम छन । जहाँ ३ देखि २१ वर्षसम्मका १ सय ६८ जना बालबालिका छन् । आश्रमहरूले बालबालिकालाई खाने लाउनेसहित विभिन्न संस्थागत र सामुदायिक विद्यालयमा निःशुल्क अध्यापन गराउने व्यवस्था मिलाएका छन ।
बढ्दो सहरीकरणसँगै अनाथ बालबालिका बढ्न थालेपछि आश्रमहरूले पछिल्लो समय सामाजिक सञ्जाल र सूचना प्रविधिको प्रयोग गरेर बालबालिकाको घरपरिवार र आफन्त खोज्न थालेका हुन्। यसले परिवारबाट हराएका र आश्रमको शरणमा पुगेका बालबालिकाका आफन्त भेटिने क्रम बढेको छ ।रूपन्देहीका विभिन्न अनाथ आश्रमबाट लामो समयदेखि हराएका १० बालबालिकालाई आफन्तको जिम्मा लगाइएको छ । एक वर्षभन्दा कम समयदेखि परिवारबाट अलग रहेका र अनाथ आश्रममा पुगेका २५ बालबालिकालाई पनि अभिभावकको जिम्मा लगाइएको छ ।
३१ श्रावण २०७९, मंगलबार
प्रतिक्रिया