श्रीमति जलाएर फरार अभियुक्त ७ वर्षपछि पक्राऊ: लागु औषध कारोवारी प्रहरी नियन्त्रणमा

कपिलवस्तु २८ पुस । श्रीमतीलाई आगो लगाएर मार्ने अभियुक्त पक्राउ परेका छन् । जिल्ला प्रहरी कार्यालय कपिलवस्तुले ७ वर्ष पछि पक्राउ गर्न सफल भएको छ । प्रहरीले भारतको सिद्धार्थनगर जिल्ला, नौगड ग्रामको धन्सा बस्ने जयराम चमारको छोरा मुलायाम भन्ने सिकन्दर चमारलाई मङ्गलवार राती १०ः३० बजे पक्राउ गरेको छ । जिल्ला प्रहरी कार्यालय कपिलवस्तुका प्रहरी नायव उपरीक्षक धर्मराज भण्डारीको कमाण्डमा खटिएको टोलीले चमारलाई पक्राउ गरेको थियो । चमारलाई नेपाल भारत सीमा स्थित यशोधरा गाउँपालिका ६ रङ्गपुर देखि पक्राउ गरेको प्रहरी नायव उपरीक्षक भण्डारीले बताउनु भयो । चमारले २०७१ फाल्गुन ३० गते ससुराली कृष्णनगर नगरपालिका ६ श्रीनगरमा श्रीमतीको हत्या गरी जलाएर फरार रहेका थिए ।
पन्देहीको तिलोत्तमा नगरपालिकामा लागुऔधषसहित ३ जना युवा पक्राउ परेका छन् । पक्राउ पर्नेमा भारत महाराजगंज नौतुनुवा बस्ने २० वर्षीय सेहावाद आलम लगायत ३ जना रहेको इलाका प्रहरी कार्यालय बुटवलले जनाएको छ । उनीहरुलाई ईलाका प्रहरी कार्यालय बुटबलबाट खटिएको प्रहरी टोलिले मंगलबार साँझ तिलोत्तमा नगरपालिका९७ भलवाडीबाट पक्राउ गरेको हो ।
यसैबिच उता गुल्मीमा वडा अध्यक्षको होटलबाट उनकी श्रीमतीसहित ८ जना जुवाडेलाई प्रहरीले पक्राउ गरेको छ । जिल्ला प्रहरी कार्यालय गुल्मीले दिएको जानकारी अनुसार रेसुङ्गा नगरपालिका–१ तम्घास भिमचोकमा रहेको भेटघाट होटल एण्ड लजबाट सोमबार उनीहरुलाई पक्राउ गरिएको हो । गुल्मीकै ईस्मा गाउँपालिका–१ का वडा अध्यक्ष चुराबहादुर खत्रीकी श्रीमती होटल सञ्चालिका ४३ वर्षीय आशा खत्रीसहितका अन्य जुवाडेहरुलाई नगद रकमसहित पक्राउ गरिएको हो ।